هاجر والثانوية العامة
لسه انا مش عارف أصدق
أن هاجر بنت قلبي
خلصت طبعا مذاكرة
كنت أقوم الفجر اشفها
السهر وأكل عينيها
والتعب هادد في حيلها
بس عزم الدنيا فيها
شاليه فوق الصبر صبر
عندها حالة عزيمة
ع المعافرة والمثابرة
الشغف ويه الإرادة
والكسل حاول معاها
أن يكسر يوم هدفها
حلمها وقت الشدائد
كان خيارها للتحدي
اللي فات م العمر كوم
لو وزنته بألف كوم
واللي جاي مهما يكون
راح يطبب ألف كفة
كنت أشفها أضحك وعدي
وأسأل الخاطر وروحي
بنتي تقدر يوم تعدي
والسؤال حازز في نفسي
معقول الكتكوت بتاعنا
راح يطير فوق السحاب
مهما كانت الصعاب
راح تكوني في الميعاد
تكسبي ظلم التحدي
كنت بسجد في الصلاة
كنت بدعيلك وربي
والدموع تسكن خدودي
وأفضل ابكي مش بخبي
أن يجبر بس خاطرك
تنجحي بس وتعدي
كنت مرعوب م النتيجة
أنها تجرح لي روحك
مش طمع في الدنيا أكتر
من طلت الفرحة في وشك
ألف شكر وحمد ليك
النجاح كان فضل منك
وأن وعدك كان في صفي
جبر خاطر بنت قلبي
هو دا أجمل هدية
مهما قلت ومهما زدت
إيه يساوي الف شكر
لو فضلت العمر ساجد
مش هوفي نعمة واحدة
م اللي انعمها عليه
مش مهم جبتي كام
حتي لو رحت تجارة
أو سياسة واقتصاد
النصيب راح نرضى بيه
مهما كان هيكون امان
حققي ذاتك وسعيك
واثبتي انك ووعيك
راح تكوني للي بعدك
قدوته في فن الحياة
الكاتب
وحيد علي الجمال
1.8.2023
ليست هناك تعليقات:
إرسال تعليق