شىراع مكسور....
بيقولولي ليه سكاتك
مليان كلام
و نظرتك للدنيا باهته
أي حاجة و السلام
الهدوء دا مش في طبعك
فين جنانك فين حنانك
و الحزن لَون الابتسام
بيقولولي ايه حكايتك
عازلة نفسك
واخدة ليه البعد دار
سايبة قلمك رافضة نفسك
و الرحيل أسهل قرار
فين كلامك عن التحدي
فين عزيمتك عل الاصرار
ما يعرفوش إن في زمانا
السكات هو الأمان
و الكلام أصبح مَشاع
و البعد عن الصغائر
و مرضى الضمائر
أسهل كتير من الرهان
عل اللي شاري و اللي باع
عل الحقيقة المطلقة
و الشراع اللي اتكسر
وسط الموج و العاصفة
غدر موج البحر واضح
بس النفوس
جواها حاجة مبهمة
الكلام صِدقُه مش حقيقة
و كدبه حاجة مُسَلمة
تهت بينهم
شفت نفسي مُغيبة
قلبي اللي راهن
ع النور زمان
أصبح كفيف
و الشمس بالنسباله طيف
على حافة البير الغويط
قلبي صرخ من الوجع
القرب منه شيء مخيف
حسيت بشيء مني اتخطف
يمكن إيماني يمكن ثباتي
بس الأكيد
حسيت حالي في منعطف
أحسن تكون عايش في حَالك
وسط ليل سواده حالِك
زارع حلمك في كف ايدك
صاين قلبك من الخداع
أفضل كتير من الصراع
بين الحقيقة و الخيال
و اللي ممكن و المحال
تهاني بركات ١٧ / ٣ / ٢٠٢٣
رووعة🌺
ردحذف