كله بيعدي
مد العنكبوت خيطه
على قلبي
نسج بيته على همي
صعب حالي على حالي
و قعدت أجلد أنا ف ذاتي
بين نفسي و بين روحي
حروب دايرة ما بين الاثنين
و أنا حايرة أراضي في مين
و لما آجي أصالحهم
تقوم نفسي تبكتني
و تجلدني تسويني
عل الجانبين
تقولي كفاية يا مسكينة
خيبتك شين
تملي واخدكي الطيبة
و ترجعيلي في الآخر
بقلب حزين
أنا ياما لقيت منك
عذاب و أنين
الجرح بيعلم
و القسوة بتتكلم
و أنتي العمى صابك
لا شايفه و لا حاسه
بالتعابين
حكايتك إيه ؟
و أعلم فيك قوليلي بإيه ؟
نسيتي أوام
و أحلامك بقت أوهام
تحاربي الكل علشانها
و في الآخر تقولي سلام
دا كان حلم مش حلمي
و لا كان في يوم حقي
أنا هاقعد هنا جنبي
و أحاسبني
و لما الدمع يغلبني
هاطبطب على جرحي
و أقول لنفسي معلشي
ما هو الطبع دا طبعي
عشش غراب البين
على وجعي
و أقول عادي
ما هو عادي يجرحني
أصل الوجع مكتوب
و الفرح مش محسوب
و أهو كله بيعدي......
الكاتبة
تهاني بركات
٢٨/ ١٢ / ٢٠٢٢
ليست هناك تعليقات:
إرسال تعليق