( شاورما )
بقلمي/ محمد سيوفى
==============
أنا عامل زى شاورما
منزوع الروح والهمه
متعلق بإستمرار
أخرس ممنوع الكلمه
وبلف بدون أعذار
دايمٱ على جمرة نار
تشوينى جلد ولحم
ماعرفش أسند لجدار
مرشوق فى كيانى سيخ
محروم من أى صريخ
متباع ملفوف بشياكه
وماليش سعر ولا تاريخ
تلعب بي الأقدار
ترميني ف إيد جزار
لو جيت أهرب من وشه
ألقانى ف وش النار
أرجع مجبور مسكين
يقابلني حد السكين
ينزل تقطيع ف جنابي
ويجيبني شمال ويمين
والقاني واقع ف رغيف
متباع جاهز ع الكيف
أنا دايمٱ لقمه طريه
إذا كنت ف شتا أو صيف
أنا حاجه ف وسط حاجات
شماعه للأزمات .....
و وجودى يشبه عدمه
معدوم الإحتياجات
أنا شئ في مهب الريح
بعلنها بشكل صريح
لو هافضل كده على حالي
إسمي هيبقى على ضريح
محمد سيوفى
ليست هناك تعليقات:
إرسال تعليق