حرف علة وحرف ساكن
فاكرة والا العمر عدى
واللي بينا نون وشَدَّة
حبنا مشدود بشِدِّة
الكسور مش مستحبة
كنت فاعل جاتله نكبة
راح عاملي الف جلطة
جم شالوني جوه خضة
والطحين بقى نُصه ردة
فاكرة يعنى لما تمشي
راح يحطوا جوه قلبي
نار وشطة؟!
اكدبي ميت الف كدبة
واعملي م الحبة قبة
اللي بينا راح أونطة
واللي قبلي شال له شنطة
عدى بيها كام محطة
قلبي كان ماشي في غاغة
تقولشي كان رايح مغاغه
ولا كان هربان بجرحُه
الدموع كانت في طرحُه
شَد استيكه ومحاها
نفسي مني استخبى
وانسى غدره حبة حبة
حظي مال ويا الأحبة
قلبي كان فرحان بقربه
كان يوماتي يجيب ف سيرته
البيوت كانت تحبه
لما يحكي عن حبيبته
فجأه غابت من حياته
والبعاد زلزل سكاته
حد يعرف ليه حبيبته
جت وسافرت مرة واحدة
م الدفاتر
اوعي تحلف.. خُد لي ساتر
اقرا تعويذة العساكر
انت حامد ابن شاكر
والأماكن اللي بينا
هو ديما فيها راكن
شكل داكن فيه مشاكل
واللي مكتوب في القصيدة
بعد بَعْدُه وبعد منه
حرف علة وحرف ساكن
امشى يالا قلبي ضامن
اوعي تاكل ف الأنامل
راح يكون البعد شامل
حق جرحك يبقى كامل
مهما تبعد..
لسه بينا كام علامة
هات لي قلبي
ويالا فارق بالسلامة
الكاتب
وحيد علي الجمال
29.7.2022
ليست هناك تعليقات:
إرسال تعليق