حكمونا اللي يخافو ربي
قالو 'رانا نخافو ربي '
وهوما العالي ما يخافوه
والكل يكدٌس ويعبٌي
والمال الفاسد خبٌوه
من داخل والاٌ من برٌه
الخير الكلٌو نهبوه
الزٌوالي لاهي في همٌو
وحتٌى في الصٌحة ساوموه
وهذا موشي شيئ مخبٌي
........................................
حكمونا 'اللٌي يخافو ربي'
وهوما ربي ما يخافوه
القلب معبٌي
وما ثمٌاشي شيئ مخبٌي
الشٌكوى لربٌي
يرتٌحنا من كمشة سرٌاق
الزٌوالي يحسب بالدٌينار
وهوما يعبٌو بالمليار
فدٌينا منٌو الخنٌار
هاذي سرقة جهار نهار
.........................................
قالوا 'رانا نخافو ربي'
واللٌي نقولو عليه يتم
ما شفنا معاهم غير الهم
ذراريهم يقرو في الخارج
منحة وجنسيٌة وخدم
وكاستنا ديما فرغانة
سرقوها وقسموها
وللخارج بعثوها
وحطٌوها الفلوس اعرم
.......................................
قالو 'رانا نخافو ربي '
وظهرو ربٌي ما يخافوش
حكم الباطل ما نحبٌوش
ما نخافوش ما نخافوش
تبكو تشكو ما حكمتوش
خنتو الأمانة بقدٌاش
.........................................
ما تنفعكم لا سفارة
لا جريدة ولا إذاعة
ولا تلافز لا إعلام
ينفخ بالباطل في
صورتكم نفخان
تحبٌوها تلمع لمعان
لا تنفع رشوة ودزٌان
ولا قوادة لروم وماريكان
..........................................
والزٌوالي اللٌي خنتوه
بطٌاله أولادو كالعادة باقي عريان
موسوس حفيان وجيعان
في سياستكم عيٌفتوه
وفي بيعة وشرية خنتوه
انتم يا 'اللٌي تخافو ربٌي '
القلب تعبٌى عليكم زاد
عمركم ما خدمتو البلاد
ياسر ملٌتكم العباد .
الكاتب
صلاح لافي
15.2.2022
ليست هناك تعليقات:
إرسال تعليق