كل شيء بقى فيكي عادي
مسحه من اللون الرمادي
زحف خُصل الشعر الابيض وسط الاسود
لون بياضك في العمارة وفي المحارة
ضلفة الشيش الورق
لون القلق جوّه العينين الدبلانين
من غياب الفطرة والعقل الرزين
لون مشاعرك ..حتى شِعرك
لون هموم المهمومين
م الرضا بالقهر ونموت مستورين
كله عادي
مسحه م اللون الرمادي
فوق سطوحك صحن دش
وألف وش وغش عادي
لون سماكي ولون هواكي
حتى لون الشمس الاصفر
ف الزوال بيميل رمادي
نبض قلب البنت الاخضر
رسم حلم الطفل يكبر
حتى صوت اللهُ أكبر ف الأدان
ولّا تسبيح الأغاني ف الودان
ولّا تسبيح الأيادي بالسلام
كله عادي
مسحه م اللون الرمادي
شهقة الخضّه ف عرف الست عادي
نفخة الملسوع ف كباية الزبادي
طعم الصبر ف الموّال
لون الحنّة والخُلخال
واللي ماشافش م الغربال
دقة الساعة ف ميعادي
كله عادي
مسحه م اللون الرمادي
وانتي ف الشباك قصادي
راضية بالذكرى ف بعادي
شايلة فكرة ف حضن بُكرة
تزققيها حروف وتقرا
أخضر ف شجرة
أحمر ف زهرة
أصفر بديع
أبيض وديع
عاد الربيع واتزوّقت بيه الجنينة
واتهز حوش المدرسة بنشيد .. بلادي .
رمادي ...شعر
الكاتب
حسام بخيت
10.11.2021
ليست هناك تعليقات:
إرسال تعليق