لساه بيدور
تعرف تحلم
إنك ساكن
جوه عمارة
في قلب الجنة
في رابع دور
وتحتك ساكن
واحد جارك
كان ف الدنيا
فى نفس الدور
وإن مراتك
وشها نور
سبحان من صور
صبحت حور
وان الشارع
مافيهوش دوشة
وضحكة جميلة
صوتها يرن
لعم سرور
كان فى الدنيا
ماشفش الراحة
كان شقيان
وعاش مستور
ساكن جانبه
عم محمد
بتاع الفول
قدرته سابها
مش محتاجها
الفقر يغور
بس خسارة
فى عز الحلم
لقيتنى فى علم
وان الواقع
فارض نفسه
حتى فى حلمى
مش مجبور
لقيتنى فى بيتى
ومراتى جانبى
وإبنى بيصرخ
وإن فى حارتى
قطع النور
قمت فى ثانية
مولع شمعة
وودانى سامعه
بياع بيدور
وتطلع جارتي
و تصرخ فيه
حالقيها منك
ولاالعيشة
ولا المية
ولا النور
وعم محمد
بتاع الفول
جانبه القدرة
وقاعد جانبه
عم سرور
اما الكون
زى ماهو
لساه بيدور
الكاتب
إبراهيم علي
2.11.2021
ليست هناك تعليقات:
إرسال تعليق