درج الذكريات...........
أنا كمان
بافتكر أوقات
وباحن ساعات
لأيام زمان
باغمض عنيا
وأشوف اللي فات ...
وقلبي ف ثواني
يعيش اللي كان ...
طيب غمض عينك
وإنت بتقرا
ولو لثواني ...
مافيهاش حاجة
جرب وإرجع
كمل تاني ...
... ... ...
... ... ...
شفت مين
رحت لفين
إبن الجيران...
بنت الجيران...
زميل الدراسة...
زميلة الدراسة...
يوم النتيجة
وفسحة آخر يوم إمتحان ...
بيوتنا القديمة
جارتنا الكريمة
كنانعاكسها بجرس البيبان...
أبويا وأمي...
خالتي وعمي...
ستي الكبيرة غدير الحنان ...
قلوبنا البريئة...
عيونا الجريئة...
وحلم معدي حدود المكان...
حروف بين سطور...
ف عتمة ونور...
رسالة حبيبي خيال ع الحيطان
ودا أول لقاء...
حنين وإشتياق
ولمسة إيدينا بعقل وجنان...
حبي اللي ضاع...
بكلمة وداع...
وآخر كلامنا مسير الزمان...
ياريتنا ما غمضنا عنينا..
مين كان قال
إن إحنا نسينا
فرح وجرح حنين وآهات
لما بنفتح درج الذكريات
مابنقدرش علي النسيان
أنا كمان
بافتكر أوقات
وباحن ساعات
لأيام زمان ......
الكاتب
عاطف كبارة
4.10.2021
ليست هناك تعليقات:
إرسال تعليق