ما نقدرش نفرط فيك.
خوفي جفاك يطول
وخوفي الزمان يمر
والحول يعقب حول
يفوتو صفي وكدر
وما تدزلي مرسول
منك يجيب خبر
ولا يوقضك مرحول
ولايشغلكش سفر
واليأس فيك يجول
ولوحدتك تنجر
وتنس غلاي عليك
تنس بكي وسهر
اللي كنت فيه شريك
وتصبح أنت ع البر
وتسيبنى للموج
يكبر فجوج فجوج
والبعد ينفخ فيه
بسرعة رقي وكبر
ويكبر معاي الخوف
والعمر ع الكفوف
يتمنى ف لحظة حنك
وباقي ما تديرش معروف
وبالفرحة توريني سنك
وأنت عارف ما ليك شريك
ولا نقدر نستغنى عنك
ما نقدرش نفرط فيك
ولانقدر نستغنى عنك..................
الكاتب
عبدالله محمد الحاضر
2.9.2021
ليست هناك تعليقات:
إرسال تعليق